2 АПРИЛ – СВЕТСКИ ДЕН НА ЛИТЕРАТУРАТА ЗА ДЕЦА И ДЕН ЗА СВЕСНОСТА ЗА АУТИЗМОТ
Во чест на роденденот на данскиот книжевник и еден од најголемите писатели на бајки, Ханс Кристијан Андерсен, 2 Април се празнува како Светски ден на детската литература. Денот на литературата за деца за првпат бил прославен во 1967, а оттогаш секоја година во светот се одбележува за да се промовира љубовта кон читањето кај децата и да се нагласи важноста на книгите.
Ние годинава им го посветивме овој ден на македонските поети за деца и го одбележивме со рецитирање на песни од македонски поети, со кои израснале и сеуште раснат многу генерации. Нашите соученици од одделенска настава го делеа мегданот во рецитирање, деветтите одделенија твореа акростихови на поими поврзани со споменатиот ден, а училишниот хор создаде особен шарм и атмосфера бидејќи изведуваше познати детски песни на текст од македонски поети. Настанот го збогативме со гости-три роднокрајни поетеси, Блага Тутеска, Мирјана Славеска, Вера Искова, кои пишуваат и поезија за деца.
Поддршка на учениците во рецитирање беа нивните наставници: Соња Конеска, Снежана Магероска, Даниела Џамбазоска, Анета Кукуноска, Наташа Ристеска, Весна Арсиќ, Ана Бошкоска, Габриела Стевананџија, Весна Конеска, Евгенија Димеска и Весна Црвенкоска. Проектот за водите – живот значат, го изработија учениците под раководство на наставничките Лидија Котеска и Наташа Ристеста Проданоска. Литературниот конкурс на тема: Екологија, го организираја наставничките Љубица Јованоска Пашоска и Марија Палеска. Работилницата за аутизам со учениците од Ученичкиот парламент ја организираше и водеше училишниот дефектолог Емилија Димеска.
Од многуте различни активности со поддршка на директорката Мартина Пројческа, една складна целина споија и вклопија во еден пакет библиотекарката Вера Искова и наставничката Виолета Христоска.
Нека е честит Светскиот ден на литературата за деца!
Нека расне свесноста за аутизмот!
Нека расне љубовта кон поезијата и целата литература за деца!
